មីយ់ាន់ម៉ា៖ នៅថ្ងៃពុធ ទី០៧ ខែកក្កដាម្សិលមិញនេះ អាជ្ញាធរមីយ៉ាន់ម៉ាបានចាប់ផ្តើមដាក់បទបញ្ជាបង្គាប់ឱ្យពលរដ្ឋក្នុងទីក្រុងយាំងហ្គូន ដែលជាទីក្រុងពាណិជ្ជកម្មដ៏ធំបំផុតរបស់ប្រទេសមីយ៉ាន់ម៉ានេះស្នាក់នៅតែក្នុងផ្ទះ ស្របពេលដែលករណីអ្នកឆ្លងកូវីដ-១៩ថ្មីនៅក្នុងប្រទេសនេះមានការហក់ឡើងខ្លាំង។
គួរឱ្យដឹងថា ទីក្រុងយាំងហ្គូននេះមានចំនួនប្រជាជនសរុបប្រមាណជាង ៧លាននាក់ឯណោះ ដែលបទបញ្ជានេះនឹងត្រូវដាក់ចេញឱ្យអនុវត្តនៅថ្ងៃព្រហស្បតិ៍នេះ ដោយមិនអនុញ្ញាតឱ្យសមាជិកលើសពីម្នាក់នៅក្នុងលំនៅដ្ឋាននីមួយចាកចេញពីផ្ទះឡើយ (លើកលែងតែក្នុងករណីពាក់ព័ន្ធនឹងផ្នែកសុខាភិបាល) ដោយច្បាប់នេះនឹងអនុវត្តទៅលើតំបន់ទីប្រជុំជនធំៗចំនួន ១០ ក្នុងតំបន់យាំងហ្គូន ដោយបូកបញ្ចូលចំនួនមនុស្សក្នុងតំបន់នោះមានរហូតដល់ជាង ១,៥លាននាក់។ ក្នុងនោះផងដែរ ច្បាប់នេះក៏មានសុពលភាពរួមបញ្ចូលទាំងតំបន់ Hlaing Thar Yar ជាទីដែលបាតុករប្រមូលផ្តុំគ្នាធ្វើបាតុកម្មតវ៉ាទៅលើរបបយោធាមីយ៉ាន់ម៉ា តាំងពីខែកុម្ភៈមក។
ចំនួនតួលេខអ្នកឆ្លងក្នុងប្រទេសមីយ៉ាន់ម៉ា មានការកើនឡើងខ្លាំងបំផុតរហូតដល់ជាង ៤,០០០ករណីនៅថ្ងៃពុធម្សិលមិញនេះ ខណៈកាលពីដើមខែឧសភាកន្លងមក ចំនួនអ្នកឆ្លងមានត្រឹមតែជាង ៥០នាក់ប៉ុណ្ណោះក្នុងមួយថ្ងៃ។
ដោយឡែក ងាកមកប្រព័ន្ធសុខាភិបាលមីយ៉ាន់ម៉ាវិញ ហាក់មានការលំបាកក្នុងការរ៉ាប់រងទៅលើចំនួនអ្នកឆ្លងដ៏គំហុកនេះណាស់ ដោយប្រព័ន្ធសុខាភិបាលមីយ៉ាន់ម៉ាបានបង្ហាញថា ពួកគេមានការលំបាកទប់ទល់ទៅនឹងបញ្ហាកូវីដនេះតាំងពីគ្រាដែលរដ្ឋាភិបាលមីយ៉ាន់ម៉ាស្ថិតក្រោមការដឹកនាំរបស់លោកស្រី អ៊ុង សានសូជីមកម្ល៉េះ។ កន្លងមក ចាប់តាំងពីមានការធ្វើរដ្ឋប្រហារយោធាពីក្រុមដឹកនាំដោយលោក មីន អ៊ុងឡាំងមក មានវេជ្ជបណ្ឌិត មន្រ្តីរាជការ និងកម្មករជាច្រើនបានប្រកាសពហិការមិនបំពេញការងារ ជាផ្នែកមួយនៃការតវ៉ាលើការដឹកនាំរបស់លោកឧត្តមសេនីយ៍ មីន អ៊ុងឡាំង៕